માએ ગરબો કોરાવ્યો - ગરબો

માએ ગરબો કોરાવ્યો ગગન ગોખમાં રે
સજી સોળ રે શણગાર મેલી દિવડા કેરી હાર
માએ ગરબો કોરાવ્યો ગગન ગોખમાં રે

ગબ્બરની લઈ માંડવી માથે ઘુમતી મોરી માત
ચુંદલડીમાં ચમકે ઝાઝી રૂપલે મઢી રાત
જોગ માયાને અંગ નર્યો નીતરે ઉમંગ
રમે જોગણીઓ સંગ રૂડો અવરસનો રંગ

માએ પાથર્યો પરકાશ ચૌદ લોકમાં રે
હે માએ ગરબો કોરાવ્યો ગગન ગોખમાં રે

ચારે જુગનો ચુડલો માનો સોળ કળાનો વાન
અંબાના અણસારા વિના હાલે નહી પાન
માના રૂપની નહીં જોડ, એને રમવાના બહુ કોડ
માને ગરબા કેરી હોડ, રૂડો અવરસનો રંગ

માએ ગરબો ચગાવ્યો ચાચર ચોકમાં રે
હે માએ ગરબો કોરાવ્યો ગગન ગોખમાં રે

અશ્રુની વર્ષા થૈ - અજ્ઞાત

અશ્રુની વર્ષા થૈ ને સ્વપ્ન ધોવાઇ ગયા,
એમને શોધ્યા વિનાજ એ દેખાઇ ગયા.
જીવન ભર પ્રેમ કરતી રહી મીરા,
અને ક્રિષ્ન બસ રાધા માંજ ખોવાઇ ગયા.

- અજ્ઞાત

તરત અવતાર લે - ચિનુ મોદી ‘ઇર્શાદ’

નામ તારું કોઈ વારંવાર લે,
તું ખરો છે કે તરત અવતાર લે.

આમ ક્યાં હું પુષ્પનો પર્યાય છું ?
તું કહે તો થાઉં ખુશ્બોદાર, લે.

તું નિમંત્રણની જુએ છે વાર ક્યાં ?
તું મરણ છે, હાથમાં તલવાર લે.

હાથ જોડી શિર નમાવ્યું; ના ગમ્યું ?
તું કહે તો આ ઊભા ટટ્ટાર, લે.

શું ટકોરા માર ખુલ્લા દ્વાર પર ?
તું કરે છે ઠીક શિષ્ટાચાર, લે.

બંધ શ્વાસો ચાલવા લાગ્યા ફરી,
આ ફરી પાછો ફર્યો હુંકાર, લે.

એ કહે ‘ઈર્શાદ, ઓ ઈર્શાદજી’
ને હતો હું કેવો બેદર્કાર, લે.


- ચિનુ મોદી ‘ઇર્શાદ’

હું તમને બહુ ચાહું છું - સૈફ પાલનપુરી

વરસોથી સંઘરી રાખેલી દિલની વાત જણાવું છું
મમતા રાખીને સાંભળજો હું તમને બહુ ચાહું છું

વાત કરો છો સખીઓ સાથે જ્યારે ધીમી ધીમી
મનની કળીઓ પણ ખીલે છે ત્યારે ધીમી ધીમી
મારી વાત હશે એમ માની હરખાઉ છું મનમાં
વડીલ જેવું કોઈ મળે તો બહુ શરમાઉ છું મનમાં

પગલાં જેવું લાગે છે ત્યાં ફુલો રોજ ધરું છું
સાચું કહી દઉં મનમાં તો ફેરા રોજ ફરું છું
ચાલ તમારા જેવી જ્યારે કોઈ લલના ચાલે છે
એવી હાલત થાય છે બસ મિત્રો જ મને સંભાળે છે

પત્ર લખીને આજે તમને દિલની વાત કહી છે મેં
કહેવાનું બસ એજ કે તમથી છાની પ્રિતી કરી છે મેં
પણ આ છેલ્લી વાત કહ્યા વિણ મારાથી રહેવાતું નથી
કોને નામે પત્ર લખ્યો છે એજ મને સમજાતું નથી

એક જ ઈચ્છા છે કે મારો પત્ર બધાને કામ આવે
પોતાની પ્રેમીકાને સૌ આ રીતે સમજાવે
દુનિયાનાં સૌ પ્રેમીઓને ભેટ અનોખી આપું છું
મારા શબ્દો વાપરવાની છૂટ બધાને આપું છું

શબ્દો મારા પ્રેમ તમારો બંને સંયોગ થશે
તો જીવનમાં કવિતાનો સાચો સદઉપયોગ થશે
મળી ન હોય કોઈને એવી જાગીરદારી મળશે
દુનીયાની સૌ પ્રિતમાં મુજને ભાગીદારી મળશે

– સૈફ પાલનપુરી

લાગશે કેવું તને? - ચિનુ મોદી ‘ઇર્શાદ’

પાંદડાં ખરશે, ખખડશે, લાગશે કેવું તને?
શ્વાસના રસ્તા અટકશે, લાગશે કેવું તને?

આવશે, મોજાં ઉછળતા આવશે, ભીંજાચશે
ચામડી બળશે, ચચરશે, લાગશે કેવું તને?

પોપડાં બાઝી જશે, ને રંગ પણ ઉપટી જશે,
લોહીનો ઉન્માદ ઘટશે, લાગશે કેવું તને ?

આવશે પાછોતરા વરસાદની મૌસમ હવે,
બુંદ તું એક એક ગણશે, લાગશે કેવું તને ?

નિત્યના અંધારનો ઇર્શાદ તું હિસ્સો થશે,
દ્રશ્યથી બાકાત બનશે, લાગશે કેવું તને ?

- ચિનુ મોદી ‘ઇર્શાદ’

ભાવ-અભાવ- શબ્દશ્યામ કૃત

સુખ નો પણ એક ભાર હોય છે,
દુખ પણ ક્યારેક એક આધાર હોય છે.

લિલ્લિછ્મ્મ લાગણી ઓ તો પલવાર હોય છે,
લાગણીઓ નો દિલમા દુકાળ પારાવાર હોય છે.

કડકતી વીજળી નો ઉજાસ ક્ષણવાર હોય છે,
વારસાદ મા લાગતા દાગ અપરંપાર હોય છે.

સંમ્બન્ધો મા શબ્દો પર મદાર હોય છે,
શબ્દોની પણ કાતિલ એક ધાર હોય છે.

મન મા ભટ્કતા અનેક વિચાર હોય છે,
ક્યારેક ભટકી જવા માજ શાર હોય છે.

તબિબો પણ આમતો ઘણા બિમાર હોય છે,
દિલ જીતનારના હાથમા કયાં તલવાર હોય છે?.

અમિરો ને પૈસાની બહુ ભરમાર હોય છે,
પણ તેનો ક્યાંકોઇ સાચો દિલદાર હોય છે?.

જીવતા આદમી નું કલેજુ ઠંડુગાર હોય છે,
કબરમા સુતેલ હૈયામા પણ ધબકાર હોય છે.

ગગન નો વરસાદ મંદ મથાર હોય છે,
અશ્રુ ના શ્રાવણ ભાદરવા ચૌધર હોય છે.

મન્દિરમા જઇ ભિખ માંગતા શાહુકાર હોય છે,
રસ્તે રઝ્ડતો ભિખારિ વધુ ખુદાર હોય છે.

દુનિયા દારી નો રોકડો વેપાર હોય છે,
દારિયાદિલના ખાતે બોલતું ગણુ ઉધાર હોય છે.

રાજાઓ ના મહેલો પણ નર્કાગાર હોય છે,
રંક્ના દિલમા પણ ભરાતા દરબાર હોય છે.

નાની મોટી અથડામણો તો બેસુમાર હોય છે,
વિચારો નો ટ્કરાવ ઘણો ગમખ્વાર હોય છે.

રુપૂમતિ ઐશ્વરિયાઓ પાસે કિમતી હાર હોય છે,
સાધુને તો સાદગીજ એક અલંકાર હોય છે.

નેતાઓની વાણીમા ઠાલા વચનોનો રણકાર હોય છે,
પીડાતી પ્રજાનુ મૌન એક ચિત્કર હોય છે.

- શબ્દશ્યામ કૃત

અધુરા પ્રેમ ના ઉદાહરણ - શ્રેયસ ત્રિવેદી ‘હોશ’

અમસ્તા જ નથી પાગલ થતા લોકો,
તેની પાછળ કૈંક કારણ હોય છે.

મદહોશ બનાવે છે પ્રેમીજનોને એવું,
ચાંદની રાત નું વાતાવરણ હોય છે.

લાગશે એ પણ મીઠા ભલે હોય ઝઘડા,
જેના છુપાયેલું પ્રેમ નું આવરણ હોય છે.

એક નજર પડતા ચોરાય જાય હૃદય,
પછી થતા એ દર્દનું ક્યાં મારણ હોય છે.

શું પૂર્ણ થયેલા પ્રેમ નો કોઈ મતલબ નથી ‘હોશ,
‘કે હંમેશા અધુરા પ્રેમ ના ઉદાહરણ હોય છે.

- શ્રેયસ ત્રિવેદી ‘હોશ’

મને દરિયો સમજીને પ્રેમ કરતી નહીં - મહેશ શાહ

મને દરિયો સમજીને પ્રેમ કરતી નહીં
કે તારી આંખોમાં ભરતીનું પૂર છે,
તારી આંખોમાં કંઈક તો જરૂર છે.

એકલી પડે ને ત્યારે મારા વિચારોના દર્પણમાં મુખ જોઈ લેજે,
ખુદને સંભળાય નહીં એમ તારા મનમાં તું મારું બસ નામ કહી દેજે;
મને હોઠ સુધી લાવી અકળાવતી નહીં
કે મારા શ્વાસોનો નાજુક બહુ સૂર છે,
તારી આંખોમાં કંઈક તો જરૂર છે.

માટીની ઈચ્છા કૈ એવી તું ચાલે તો અંકિત પગલાં હો તારાં એટલાં,
મારા મળવાના તારા મનમાં અમાપ રાત દિવસો સદાય હોય જેટલાં;
મને આંખોના ઓરડામાં રોકતી નહીં
કે મારું હોવું તારાથી ભરપૂર છે,
તારી આંખોમાં કંઈક તો જરૂર છે.

- મહેશ શાહ

પ્રેમમાં તો એવું ય થાય છે.

પ્રેમમાં તો એવું ય થાય છે.
સાવ અણધાર્યું કોઇ ગમી જાય છે.
પ્રેમમાં ના પડવાનું, ઉપડવાનું છે, સખી,
સંગાથે ઊડવાનું થાય છે.

...જયારે અણધાર્યું કોઇ ગમી જાય છે.
ત્યારે અંદર હેમંત કોઇ ગાય છે.

પ્રેમમાં જો હોઇએ તો પ્રેમમાં જ રહીએ
બસ એવું એવું તો પ્રેમમાં થાય છે.
જયારે અણધાર્યું કોઇ ગમી જાય છે

વ્યસ્ત ઝીંદગી - 'હું' કિરણકુમાર રોય (Vyast Zindagi - 'Hun' KiranKumar Roy)

મારી વ્યસ્ત ઝીંદગી કઈક એ રીતે જીવી લઉં છું,
કે એક મુક્તક,
એક ગઝલ,
એક શેર લખી લઉં છું..

પીંજરા મા પુરઈ ને રહેવાની આદત થઈ ગઈ છે હવે,
સમય મળે તો આકશ મા આશાની ઉડન ભરી લઉં છું
હોંશલો હોય તો કોઇ તુફાન કે આન્ધી શુ??
'હું' તો હાથ ના હલેશા કરી દરિયો તરી લઉં છું

- 'હું' કિરણકુમાર રોય.